• Hi ta’ sfortuna li r-reazzjonijiet għall-position paper li ktibna, attribwew lilna dikjarazzjonijiet li la jesprimu s-sentimenti tagħna u lanqas għandhom x’jaqsmu ma’ dak li ktibna.
    a)  M’hemm xejn fil-paper li tista’, anke b’xi mod remot, tiġi interpretata li tfisser li l-omosesswalità hi marda jew diżordni.
    b)  Mhux veru li l-paper torbot l-omosesswalità mal-abbuż ta’ tfal.
    c)  M’hemm xejn fil-paper li juri sentiment negattiv jew li b’xi mod inaqqas mir-rispett għad-dinjità ta’ persuni LGBTIQ.
    d) Imkien ma jingħad li l-orjentazzjoni sesswali, l-identità tal-ġeneru u l-espressjoni tal-ġeneru għandhom jiġu soppressi jew eliminati.
    e) M’hemm ebda referenza li persuni bisesswali jistgħu jingħataw it-tikketta ta’ promiskuwi.
    Dawn l-opinjonijiet ma jidhru imkien fil-position paper li ktibna. Ħadd minna ma jaqbel ma’ dawn l-opinjonijiet.
    Għall-kuntrarju, il-position paper tgħid b’mod ċar li:
    a) l-orjentazzjoni sesswali, l-identità tal-ġeneru u l-espressjoni tal-ġeneru f’kull individwu, għandha tiġi affermata mhux mibdula, repressa jew eliminata. Dan hu prinċipju etiku u legali li dwaru ma jistax ikun hemm kompromess.
    b) it-terapija ta’ konverżjoni kontra r-rieda ħielsa u l-kunsens infurmat ta’ dak li jkun, għandha tkun ipprojbita.
    c) il-kwistjoni tal-orjentazzjoni sesswali, l-identità tal-ġeneru u l-espressjoni tal-ġeneru, fil-prattika, mhux dejjem tista’ tkun daqshekk sempliċi u ċara.
    d) professjonisti speċjalizzati għandhom jitħallew japplikaw diskrezzjoni xierqa fl-eżerċizzju tal-professjoni tagħhom għall-ġid tal-klijenti tagħhom.
    Hu ironiku li f’pajjiż demokratiku li jgħid li jippromwovi libertajiet ċivili, il-Liġi li qed tiġi proposta tippermetti biss counselling li jgħin lil dak li jkun jesplora l-identità sesswali tiegħu u ma tħallix lin-nies ifittxu l-għajnuna li b’libertà jkunu jixtiequ biex isolvu dubji jew mistoqsijiet relatati mal-orjentazzjoni sesswali tagħhom, mal-identità tal-ġeneru u mal-espressjoni tal-ġeneru permezz ta’ forom ta’ terapija li tista’ tgħinhom.
    Aħna nemmnu li l-Liġi għandha tirrikonoxxi b’mod ċar li kull persuna adulta tkun ħielsa li tingħata kwalunkwe servizzi psikoloġiċi jew servizzi oħra terapewtiċi li tixtieq jew teħtieġ, dwar

    l-orjentazzjoni sesswali, l-identità u l-ġeneru tagħha.
     
    Rev. Prof. Emmanuel Agius
    Dekan tal-Fakultà tat-Teoloġija u Membru tal-Grupp Ewropew ta’ Etika fix-Xjenza u Teknoloġijji Ġodda (Kummissjoni Ewropea)
     
    Prof. Kevin Aquilina
    Dekan tal-Fakultà tal-Liġi
     
    Dr Austin Bencini
    Avukat Kostituzzjonali
     
    L-Imħallef Giovanni Bonello
    Eks-Imħallef tal-Qorti Ewropea tad-Drittijiet tal-Bniedem
     
    Dr Nadia Delicata
    Lekċerer fl-Università ta’ Malta
     
    Rev. Prof. Paul Galea
    Psikologu
     
    Rev. Prof. George Grima
    Professur fil-Fakultà tat-Teoloġija