Monsinjur Victor Grech, li kien pijunier fil-prevenzjoni u riabilitazzjoni tad-droga f’Malta, kien rikonoxxut bil-Premju Nazzjonali Ħaddiem tas-Sena.

fl-1984 Dun Victor Grech, li għandu 94 sena, beda l-proġetti tal-Caritas biex jgħin fi programmi ta’ prevenzjoni u riabilitazzjoni mid-droga u, sena wara, waqqaf l-ewwel Komunità Terapewtika għal dawk li jabbużaw mid-droga f’Malta.

Ħadem biex ikun hawn l-ewwel xelter residenzjali għall-irġiel kif ukoll għan-nisa. Mons Victor Grech fetaħ ukoll Dar għar-riabilitazzjoni tal-Priġunieri bi problemi ta’ droga.

Wara li kien ordnat saċerdot, serva wkoll bħala Viċi-Rettur u Rettur fis-Seminarju. Huwa kien ukoll Direttur Nazzjonali għall-Vokazzjonijiet, ħadem biex titwaqqaf l-ewwel komunità ta’ saċerdoti Maltin fil-Brażil, u kkollabora ma’ Monsinjur Delleport fit-twaqqif tal-European Seminary f’Maastricht.

Monsinjur Grech kien wieħed minn numru ta’ persuni li kienu rikonoxxuti għall-ħidma tagħhom fl-edizzjoni ta’ din is-sena tal-Premju Nazzjonali Ħaddiema tas-Sena. Ir-rebbieħa l-oħra huma:

  • Premju Nazzjonali Ħaddiem/a tas-Sena – Dun Victor Grech
  • Maniġer/Kap tas-Sena – Dr Renzo De Gabriele, imexxi l-Anzjanità Attivà u Kura fil-Komunità
  • Tim tas-Sena – Direttorat għall-Kura tad-Dimensja
  • Organizzazzjoni li tippromwovi l-bilanċ bejn ix-Xogħol u l-Ħajja privata – Multivend Services Limited
  • Premju għall-aħjar Imprenditriċi/Imprenditur – Jacques Scerri, Direttur Maniġerjali tal-kumpanija Centro Casalinga
  • Premju għall-aktar Mexxej/ja Żagħżugħ/a Ispiranti – Dr Geraldine Spiteri Lucas, CEO Malta Business Registry
  • Premju għall-aktar Kumpanija li tippromwovi r-Responsabbiltà Soċjali – Fondazzjoni Nazareth
  • Premju għall-aktar Organizzazzjoni Inklussiva – Aġenzija Kulturali għall-Belt Valletta
  • Premju ta’ lifetime achievement – Albert Marshall

Il-President jgħid li l-Premju Nazzjonali jixhed il-bżulija u d-dedikazzjoni

Il-President ta’ Malta George Vella qal li l-Premju Nazzjonali Ħaddiema tas-Sena huwa ċertifikat prestiġjuż li jixhed il-bżulija u d-dedikazzjoni tal-ħaddiema.

“Huwa tassew sabiħ u importanti li niċċelebraw dawk l-individwi fostna li għandhom karattru bi kwalitajiet u ħiliet ta’ valur u ta’ ispirazzjoni. Il-ħaddiema, u x-xogħol li jagħmlu, jiffurmaw il-fus li fuqu tiġi bbażata s-soċjetà tagħna, is-sinsla tal-progress soċjali u ekonomiku ta’ pajjiżna,” qal il-President.

Waqt li feraħ lir-rebbieħa u n-nominati kollha tal-Premju Nazzjonali Ħaddiema tas-Sena, il-President tkellem fuq kif ix-xogħol jgħin lill-bniedem jikber, jiskopri u jiżviluppa t-talenti u l-kapaċitajiet tiegħu.

“Għalhekk aħna ngħidu li x-xogħol huwa s-salmura tal-ġisem, għaliex ħidmietna tagħtina sens aktar b’saħħtu t’identità u rwol produttiv f’kuntest soċjali aktar wiesa’,” stqarr il-President waqt li rrefera wkoll għat-tibdil kontinwu fir-realtà tal-ambjent tax-xogħol.

Il-President qal li rridu nżommu f’moħħna li l-ħaddiem huwa l-akbar riżorsa li għandha Malta. “Pajjiżna huwa mimli b’ħaddiema kompetenti u kapaċi, li lesti jagħmlu aktar milli huwa mistenni minnhom biex joffru servizz ta’ eċċellenza. Huwa importanti għalhekk li nagħrfu kif nieħdu ħsieb il-ħaddiema tagħna bl-aħjar mod possibbli,” qal il-President George Vella.

“Ipprattikaw it-tolleranza għal xogħol dinjituż u li jagħti dinjità”

B’referenza għaż-żieda tal-ħaddiema barranin fostna u l-kontribut siewi li qed jagħtu fl-ekonomija, Dr Vella ħeġġeġ lil kulħadd biex jipprattika t-tolleranza meħtieġa u biex nippromwovu ambjent tax-xogħol iżjed inklussiv li jagħti d-dinjità mistħoqqa lil kulħadd. 

Fid-diskors tiegħu s-Segretarju Parlamentari għad-Djalogu Soċjali, Andy Ellul, qal li dan il-premju jirrifletti kemm, anke f’dawn iż-żminijiet ta’ intelliġenza artifiċjali u teknoloġiji diġitali, il-ħaddiem kien, għadu u jibqa’ l-pedament tas-suċċess ekonomiku Malti f’kull settur u kuntest.

Is-Segretarju Parlamentari tkellem dwar il-ħidma tal-Gvern dwar it-titjib fil-kwalità tal-ħajja u l-kundizzjonijiet tal-ħaddiema, fosthom l-għotja tal-akbar żieda fil-paga minima għall-erba’ snin li ġejjin u t-tfassil ta’ sett liġijiet ġodda li jirregolaw l-aġenziji tax-xogħol, li jħaddmu magħhom eluf ta’ ħaddiema Maltin kif ukoll barranin. Dawn il-liġijiet il-ġodda se jkunu qed itejbu l-kundizzjonijiet tax-xogħol u d-drittijiet ta’ dawn il-ħaddiema.

Waqt li feraħ lill-parteċipanti kollha, is-Segretarju Parlamentari qal li l-Gvern se jkompli jaħdem id f’id mal-imsieħba soċjali biex il-pajjiż jimxi lejn ekonomija aktar sostenibbli, u favur il-mobbiltà soċjali, il-ġustizzja soċjali u l-inklużjoni soċjali.

Sors: Newsbook Malta