Intemmet f’nofsillejl il-Maratona Oħloq Tbissima, maratona ta’ 60 siegħa xandir live b’risq is-Soċjeta’ Missjunarja ta’ San Pawl (MSSP).
Is-sittin siegħa kienu mimlija attivita. Il-pubbliku ipparteċipa f’quddies, rużarju u mumenti oħra ta’ talb. Segwa wkoll filmati esklussivi, djalogu dirett mal-missjunarji permezz ta’ Skype, diskussjonijiet, rokna għat-tfal, Musichiere, Charades, Oħloq Tbissima Song Festival u diversi varjetajiet immirati biex jolqtu l-gosti tal-familja kollha, fejn wieħed seta’ japprezza l-livell għoli tat-talent Malti u Għawdxi. Għall-mumenti ta’ l-aħħar ta’ l-ispetaklu, l-publiku laqgħa l-Winter Moods qalb ferħ u entużjażmu.
Marthese Brincat f’messaġġ li wasslet għall-eqħluq irringrazzjat lil kull min b’xi mod jew ieħor ipparteċipa u ħadem biex din il-maratona setgħet tkun possibli. Hija fissret kemm isir ġid permezz tal-flus li inġabru u rringrazzjat lil kull min ta d-donazzjoni tiegħu għax kif qalet, dan huwa rikonoxximent tal-ħidma missjunarja li s-Soċjeta’ Missjunarja ta’ San Pawl qed twettaq.
Fil-kelmtejn ta’ l-egħluq Fr. Louis Mallia mssp irringrazzja mill-qalb lil kull min ta s-sehem tiegħu biex din il-Maratona għal sena oħra reġgħet kienet esperjenza sabiħa u ta’ suċċess, fejn l-imħabba li biha ħadem kullħadd kien jinħass sew. Kif spjega Fr. Louis, anke permezz tat-teknoloġija moderna, stajna ningħaqdu mal-missjunarji permezz ta’ Skype u dan kien mod ieħor li għaqqad din l-inizjattiva minn hawn Malta mal-missjunarji fil-Peru, Pakistan u l-Filippini.
Il-Maltin u l-Għawdxin għal darb’oħra reġgħu wrew l-appoġġ tagħhom billi taw donazzjonijiet u b’hekk intlaħħqet iċ-ċifra sabiħa ta’ €171,152 li tħabbret fi tmiem il-Maratona, li ntemmet bl-innu Oħloq Tbissima, din is-sena kantat minn Fr. Karm Debattista mssp flimkien ma’ Glen Vella, Leontine, Angela u Josef.
Kull min jixtieq jagħti d-donazzjoni tiegħu jista’ jagħmel dan billi jċempel fuq:
€10 51602004
€15 51702007
€25 51802009
SMS €4.66 50618099
Il-linji tat-telefon jibqgħu miftuħin sal-31 ta’ Lulju.
Il-Maratona ixxandret live minn fuq l-istazzjon tat-televiżjoni – Education 22, b’diversi ħinijiet ta’ trasmissjoni wkoll fuq TVM, NET TV, ONE TV, u Favourite Channel TV. Kien hemm ukoll diversi kollegamenti ma’ l-istazzjonijiet lokali tar-Radju. Il-Maratona kienet streamed live kollha kemm hi fuq is-sit elettroniku ta’ CAM Productions international: www.camcpi.org . Wieħed jista wkoll jidħol fuq: www.facebook.com/ohloqtbissima biex jara l-informazzjoni aġġornata.
Agħfas fuq ir-ritratt biex tkabbar.