• Hekk kif baqa’ ftit iktar minn 600 jum biex fil-Panama jiġi ċċelebrat il-Jum Dinji taż-Żgħażagħ, ntgħażel il-logo ta’ din il-festa.

    Hi t-tpinġija ta’ Ambar Calvo, studenta universitarja ta’ 20 sena mill-Panama, li se tibda tintuża minn issa sas-27 ta’ Jannar 2019.

    Il-logo, li għandu forma ta’ qalb u tal-ittra “M” (għal Marija), hu maqsum f’ħames biċċiet: jidher il-kanal tal-Panama li jirrappreżenta t-triq tal-pellegrin fil-mixja tiegħu lejn Ġesù, silhouette tal-post fejn se jilqa’ l-pellegrini, is-salib tal-pellegrini, silhouette tal-Madonna u ħames ċrieki bojod li jirrappreżentaw il-kontinenti tad-dinja u fl-istess ħin anke l-kuruna fuq ras il-Madonna.

    Il-kuluri użati għal-logo huma l-kuluri li hemm fuq il-bandiera tal-pajjiż: il-blu, l-aħmar u l-abjad. L-aħmar jirrappreżenta l-konservazzjoniżmu, il-blu l-liberaliżmu u l-abjad jirrappreżenta l-paċi u l-onestà tal-Panamani.

    Iċ-ċelebrazzjoni tal-Jum Dinji taż-Żgħażagħ, li se jsir bejn it-22 u s-27 ta’ Jannar 2019, se tkun attività unika għan-nies tal-pajjiż hekk kif mit-3 miljun Panamani, 80% minnhom huma Kattoliċi.