L-istatwa titulari ta’ San Gejtanu tal-Ħamrun ġiet imbierka mill-Papa Franġisku u mbagħad ħarġet mill-Bażilika ta’ San Pietru akkumpanjata minn mużika li ndaqqet mill-każini tal-banda tal-Ħamrun stess is-Sibt.
Il-pjazza ewlenija tal-Vatikan kienet mimlija devoti tal-qaddis, inklużi Maltin li siefru Ruma speċifikament biex jieħdu sehem f’dan il-pellegrinaġġ storiku.
Wara talb mill-Papa, l-istatwa nġarret fil-Knisja ta’ Santa Maria di Transpontina, Knisja mmexxija mill-Karmelitani fil-Via della Conciliazione ta’ Ruma.
Baned mill-Għaqda tal-Mużika San Gejtanu il-Ħamrun u l-Għaqda Mużikali Immakulata Kunċiżżjoni, iż-żewġ każini tal-baned tal-Ħamrun, kienu preżenti biex jimmarkaw l-okkażjoni bil-mużika.
Ċelebrazzjonijiet tal-500 sena anniversarju
Fl-okkażjoni tal-500 anniversarju mit-twaqqif tat-Teatini, fit-28 ta’ Awwissu l-vara titulari ta’ San Gejtanu tal-Parroċċa tal-Ħamrun ittieħdet Ruma, fil-Bażilika ta’ Sant’Andrea della Valle, fejn hemm il-kwartieri tal-Ordni.
Iktar kmieni din il-ġimgħa l-istatwa ddaħħlet fil-Bażilika ta’ San Pietru u tqiegħdet fuq ix-xellug tal-Altar tal-Konfessjoni.
Xogħol fil-kartapesta tal-iskultur Malti Carlo Darmanin, li lestieha fl-1885, ix-xbieha turi l-viżjoni mistika li seħħet fl-1517, fejn il-Verġni Marija tidher tnewwel lil Ġesù tarbija f’idejn San Gejtanu, magħruf ukoll bħala dak li ta l-ħajja lit-tradizzjoni tal-presepju armat fil-knejjes u fid-djar fi żmien il-Milied.
Għall-ewwel darba fi kważi 140 sena ta’ storja, l-istatwa ħalliet Malta, fejn se terġa’ lura fit-30 ta’ Settembru, wara li mil-lum tqatta’ l-bqija tax-xahar fil-Bażilika ta’ Sant’Andrea della Valle.
Sors: Newsbook.com.mt