Il-maratona Oħloq Tbissima ta’ din is-sena ġiet fi tmiemha l-Ħadd 13 ta’ Lulju fil-11:30pm, u nġabret is-somma totali ta’ €441,590.

Huma rringrazzjaw lil kull min ta d-donazzjoni tiegħu.

Mill-istudios tas-CPI Media, il-Ġimgħa 11 ta’ Lulju, Fr Louis Mallia mssp fl-4pm inawgura t-23 edizzjoni tal-maratona ta’ xandir Oħloq Tbissima.

Il-Ġimgħa Oħloq Tbissima waqfet fil-11pm, is-Sibt 12 ta’ Lulju kienet mill-4pm sal-11pm u l-Ħadd 13 ta’ Lulju kienet mill-4pm sal-11.30pm. 

Il-maratona xxandret f’diversi ħinijiet fuq TVM, Net u One kif ukoll fuq Fliving.  

22 sena ta’ għajnuna lill-Missjunarji Maltin li għal ħafna snin ilhom jaħdmu mal-familji fqar fil-Perù, fil-Pakistan u l-Filippini.  Familji li kieku ma kienx għal dawn il-patrijiet qalbiena, tkun diffiċli ħafna għalihom biex jgħixu b’dinjità. Diffiċli biex jieħdu kura medika, diffiċli biex jibgħatu lit-tfal tagħhom l-iskola, diffiċli biex ikollhom almenu ikla kulljum.

Dawn huma r-raġunijiet għaliex fl-eqqel tas-sajf tiġi organizzata l-maratona fl-għeqqel tas-sajf. Kull pajjiż li jingħata l-għajnuna għandu l-isfidi tiegħu, għandu l-ħtiġijiet tiegħu, għandu l-istorja tiegħu. Per eżempju, il-Perù, ħafna familji minħabba nuqqas ta’ xogħol ikollhom jispustjaw ruħhom minn belt għall-oħra, minn rħula qalb il-muntanji għall-ibliet, biex forsi jsibu jaħdmu. 

Ħafna draba lanqas kamra fejn jgħixu ma jkollhom, għax litteralment jitilqu kif ngħidu aħna l-maltin b’ta fuqhom senduqhom.  Ikunu jridu jibdew mill-bidu.  Faċli?  Żgur li le, u għalhekk hawn jidħlu l-missjunarji biex jgħinuhom jibdew jibnu ħajja u għixien ġdid.  Wieħed mill-proġetti li jixtieq jgħin fih Fr Alex huwa nutrizzjoni lit-tfal li minħabba nuqqas ta’ ikel huma anemiċi u għalhekk jimirdu ħafna. Statistika tgħid li fiż-żona fejn qed jgħinu l-patrijiet mssp hemm madwar 5000 tifel u tifla li ma jieklux tajjeb kulljum.  Jixtieq jghin ukoll bin-nutrizzjoni lil nisa li jkunu tqal ghax jekk huma jkunu nutriti tajjeb, it-trabi li jitwieldu jkunu b’sahhithom ukoll.  Il-problema hija wkoll fuq l-anzjani ghax meta jimirdu jmutu ghax ma jkunux b’sahhithom bizzejjed biex jiggieldu l-marda.

Fil-Pakistan,  minħabba li l-maġġoranza  tal-poplu huma musulmani,  il-ftit insara li hemm, jiġu mwarrba mis-soċjeta’, bil-konsegwenza li ma jingħatawx xoghol,  it-tfal tal-familji nsara ma jkunux jistgħu jattendu skola, l-anzjani u min ikollu bżonn għajnuna medika ma jkunux jistgħu jieħdu l-għajnuna fi klinici jew sptar, etc etc.  Huma l-missjunarji li jipprovdu dan kollu. Proġett important li Fr Pierre jixtieq ikompli jagħmel huwa Sistema ta’ reverse osmosis biex il-fqar ikollhom ilma tajjeb għax-xorb.  Diġa’ għamlu żewġ impjanti imma jeħtieġ li jagħamlu aktar biex aktar nies fqar jibbenefikaw minn dan is-servizz. 

Fil-Filippini, hemm storja oġra.  Fil-Filippini hemm miljuni u miljuni ta’ nies. Qrib id-dar fejn jgħixu l-patrijiet mssp f’Manilla, jgħixu diversi nies fqar, f’dawk li jgħidulhom  squatters, jiġifieri, familji numeruzi li jgħixu f’kamra waħda jew tnejn. Allura matul il-ġurnata u mal-lejl, in-nies iċemplu l-bieb tad-dar min għal ħaġa u min għal oħra. Ma jieqfu qatt. Barra min hekk Fr Joe Cremona li qed jgħin lin-nies f’Bataan, huwa wkoll iżur villaġġ il-bogħod ħafna qalb il-muntanji, fejn f’dan il-villaġġ litteralment ma hemm xejn.  Fr Joe, qed jagħmel sistema taħt l-art biex dawn l-indiġeni jkollhom l-ilma biex jinqdew f’dak kollu li normalment persuna/familji jkollhom bżonn.  Mingħajr ilma wieħed ma jistax jgħix u jkun b’saħħtu.  Ovvjament Fr Joe jgħin lill dawn in-nies billi jtihom il-ħwejjeġ, u anke affarijiet tal-ikel.

F’Malta, parti mid-donazzjonijiet li jingabru jmorru wkoll ghad-Dar ta’ San Guzepp Santa Venera. F’din id-dar jgħixu 15 il-tifel ta’ etajiet differenti u care workers li jkunu maghhom 24/7. Jiġri li meta jaghlqu 18 il-sena, dawn ma jkunux jistgħu jibqgħu mat-tfal l-oħra, u jekk ma jkunux indipendenti/jaħdmu,  dawn iż-żgħażagħ  jispiċċcaw barra t-triq.  Għalhekk Fr Louis Mallia din is-sena parti mill-flus li jinġabru waqt Ohloq tbissima jixtieq jibni flats biex huma jkunu jistgħu jibqgħu  hawn xorta taħt osservaljanza imma ndipendenti mill-oħrajn. Dan sakemm ikunu jistgħu jmorru jgħixu għall-rashom.   Proġett kbir li jiswa’ ħafna imma li bl-għajnuna tad-donazzjonijiet tal-Maltin u l-Għawdxin ikun jista’ ma jibqax fuq karta imma jsir realtà.

Agħti t-tama, agħti donazzjoni:

Ir-rettur tal-kulleġġ MSSP fir-Rabat – Fr Clinton Farrugia, li għamel l-ewwel esperjenza missjunarja tiegħu ta’ 19-il sena, qal li “għalkemm nisimgħu ħafna biex nieħdu ħsieb tagħna nfusna, irridu nkunu wkoll nies li nibnu pontijiet anke jekk dan jiġi bi skumdità jew sagrifiċċju”.

Sors: Newsbook Malta