Ir-regolamenti għad-dħul fl-iskejjel tal-Knisja f’Malta għas-sena skolastika 2023-2024 jinsabu fuq il-websajt tal-Arċidjoċesi ta’ Malta. Ir-regolamenti għad-dħul fl-iskejjel tal-Knisja f’Għawdex se jkunu online sal-25 ta’ Novembru 2022.
B’kollox ser ikun hemm 1,852 post vakanti għall-istudenti (1,601 f’Malta u 251 f’Għawdex). L-applikazzjonijiet se jsiru kollha online. L-applikazzjonijiet tal-‘Ewwel Kriterju’ għal Malta jsiru bejn l-24 ta’ Novembru u l-1 ta’ Diċembru 2022 waqt li dawk għal Għawdex ikunu bejn id-9 ta’ Diċembru u l-15 ta’ Diċembru 2022.
L-applikazzjonijiet tal-‘Applikanti l-Oħra’ jintlaqgħu bejn l-1 u l-14 ta’ Frar 2023. Il-lista tad-dokumenti meħtieġa, il-ġranet meta wieħed għandu japplika u dettalji oħra huma mniżżla fir-regolamenti.
Il-proċess tad-dħul fl-iskejjel tal-Knisja f’Malta jiddetermina d-dħul fl-ewwel u t-tieni sena kindergarten, fl-ewwel sena primarja u fl-ewwel sena sekondarja. Din is-sena hemm ukoll dħul fir-raba’ sena primarja fl-iskola tal-bniet ta’ St Monica, il-Gżira.
L-applikazzjonijiet tal-‘Ewwel Kriterju’ f’Malta jinkludu tfal li huma fi djar tal-Knisja, tfal tal-impjegati tal-iskejjel tal-Knisja u tas-Segretarjat għall-Edukazzjoni Nisranija, aħwa li jistgħu jinkitbu fl-istess skola ta’ ħuthom, transfers bejn skejjel tal-istess entità reliġjuża, u tfal li qegħdin fi skejjel tal-Knisja bla kontinwità.
Ser jiġu allokati wkoll numru ta’ postijiet għal tfal li jaqgħu taħt il-kriterju ta’ każijiet serji u li għalihom hemm regolamenti speċifiċi. Il-każijiet serji jinkludu tfal li għandhom jew ser ikollhom bżonn l-għajnuna ta’ LSE, każijiet soċjali u każijiet ta’ tfal li qed ifittxu ażil. Il-każijiet serji jsegwu proċess parallel għall-applikazzjonijiet l-oħra.
Il-proċess tad-dħul fl-iskejjel tal-Knisja f’Għawdex jiddetermina d-dħul fl-ewwel sena kindergarten u fl-ewwel sena sekondarja. L-applikazzjonijiet tal-‘Ewwel Kriterju’ f’Għawdex jinkludu tfal li qegħdin fis-sitt sena primarja fl-iskejjel tal-Knisja f’Għawdex, tfal tal-impjegati tal-iskejjel tal-Knisja, aħwa li jistgħu jinkitbu fl-istess skola ta’ ħuthom, każijiet soċjali, każijiet ta’ tfal li qed ifittxu ażil, applikanti mill-Għasri, u applikanti għal St Francis Nadur Kindergarten. Applikanti li għandhom bżonn l-għajnuna ta’ LSE ta’ dawn il-kriterji japplikaw skont r-Regolamenti tad-Dħul f’Għawdex.
In-numru ta’ postijiet vakanti għad-dħul fl-iskejjel tal-Knisja f’Malta għas-sena skolastika
2023-2024 huwa kif ġej:
| Sena /MALTA | Postijiet Vakanti Subien | Postijiet Vakanti Bniet | Total Postijiet Vakanti |
| L-ewwel sena kindergarten | 95 | 85 | 180 |
| It-tieni sena kindergarten | 95 | 362 | 457 |
| L-ewwel sena primarja | 359 | 227 | 586 |
| Ir-raba sena primarja | 0 | 25 | 25 |
| L-ewwel sena sekondarja | 264 | 89 | 353 |
| TOTAL | 813 | 788 | 1,601 |
In-numru ta’ postijiet vakanti għad-dħul fl-iskejjel tal-Knisja f’Għawdex għas-sena skolastika 2023-2024 huwa kif ġej:
| Sena / Għawdex | Postijiet Vakanti Subien | Postijiet Vakanti Bniet | Total Postijiet Vakanti |
| Lewwel sena kindergarten |
|
| 108 |
| Lewwel sena sekondarja | 71 | 72 | 143 |
| TOTAL |
|
| 251 |
Dħul fl-iskejjel tal-Knisja fl-2022
Għas-sena skolastika preżenti (2022-2023), is-Segretarjat għall-Edukazzjoni Nisranija rċieva 3,719 applikazzjoni għal 1,725 post vakanti f’diversi livelli tad-dħul għal skejjel f’Malta. Għal darboħra, it-talba kienet aktar mid-doppju tal-postijiet disponibbli fl-iskejjel tal-Knisja f’Malta. Is-Segretarjat irċieva wkoll 324 applikazzjoni għal 248 post vakanti għall-iskejjel tal-Knisja f’Għawdex. Il-poloz u l-għażla tal-iskola saru online.