Il-Fondazzjoni tal-Konkatidral ta’ San Ġwann bi pjaċir tħabbar li s-Sett ta’ Arazzi se jkun esebit fil-Konkatidral ta’ San Ġwann wara proċess estensiv ta’ restawr li dam għaddej 16-il sena fil-Laboratorji De Wit fil-Belġju. L-aħħar darba li ġew esebiti kien waqt iż-żjara tal-Papa San Ġwanni Pawlu II f’Malta fl-1990.
Is-sett ta’ arazzi kien ikkummissjonat mill-Gran Mastru Ramon y Perellos mal-elezzjoni tiegħu fl-1697. Is-sett jikkonsisti f’29 biċċa li juru t-Trijonf tal-Knisja Kattolika Rumana, xeni mill-ħajja ta’ Kristu u t-tnax-il appostlu. Il-maġġoranza tal-arazzi kienu bbażati fuq kartun tal-artist famuż Peter Paul Rubens u minsuġa fi Brussell min-nissieġ Judocus De Vos, id-disinn kumpless tagħhom minsuġ mis-suf u l-ħarir pur jagħmluhom vera kapolavur tal-arti Ewropea.
Il-proċess tar-restawr kien kumpless u ħa ħafna ħin għax maż-żmien il-kundizzjoni tagħhom marret għall-agħar u kkawża diversi ħsarat. Il-proġett sar minn tim ta’ esperti f’De Wit Royal Manufacturers fil-Belġju. L-arazzi ġew imnaddfa u msewwija bir-reqqa, u l-kuluri u d-disinji oriġinali ġew restawrati għall-glorja ta’ qabel. Il-proċess ta’ restawr kien iffinanzjat mill-Fondazzjoni tal-Konkatidral ta’ San Ġwann, li hija ddedikata għall-preservazzjoni u l-promozzjoni tal-wirt kulturali ta’ dan is-sit uniku ta’ Wirt Dinji tal-UNESCO.
L-arazzi, li se jkunu mdendlin fin-Nava Prinċipali tal-Konkatidral ta’ San Ġwann, se jintwerew bejn il-5 ta’ Mejju u l-24 ta’ Ġunju 2023. Din hija opportunità rari għall-viżitaturi biex jaraw dawn l-arazzi mill-isbaħ u japprezzaw is-sbuħija storika u s-sinifikat reliġjuż tagħhom. Il-wirja, li se tattira dilettanti tal-arti minn madwar id-dinja, bla dubju se tkun il-qofol tal-kalendarju kulturali f’Malta. Bil-ħerqa li nilqgħu viżitaturi fil-Konkatidral ta’ San Ġwann biex tesperjenza dan l-avveniment kulturali uniku.