Għeżież ħuti,
Nesprimi l-qrubija tiegħi mal-Komunità San Josè de Apartado, fil-Kolombja, fejn xi jiem ilu sfaw assassinati tfajla u ġuvni. Fl-2018, din il-komunità kienet ġiet ippremjata bħala eżempju ta’ impenn favur l-ekonomija solidali, il-paċi u d-drittijiet umani.
Niżgura talbi għall-vittmi tal-attentat terroristiku vili li sar ilbieraħ filgħaxija f’Moska. Il-Mulej jilqagħhom fil-paċi tiegħu u jfarraġ il-familji tagħhom. Jalla jikkonverti l-qlub ta’ min jippjana, jorganizza u jwettaq dawn l-azzjonijiet diżumani li joffendu lil Alla, li kien qal: “La toqtolx” (Eż 20,13).
Insellem lilkom fidili minn Ruma u pellegrini minn pajjiżi oħra. Insellem b’mod partikolari lid-delegazzjoni mill-belt ta’ Sanremo, li din is-sena wkoll, fidila lejn tradizzjoni li ilha erba’ sekli, offriet il-weraq tal-palm minsuġ għal din iċ-ċelebrazzjoni. Grazzi, nies ta’ Sanremo! Il-Mulej iberikkom.
Għeżież ħuti, Ġesù daħal Ġerusalemm bħala Re umli u paċifiku: niftħulu qlubna! Hu biss jista’ jeħlisna mill-ostilità, mill-odju, mill-vjolenza, għaliex huwa l-ħniena u l-maħfra tad-dnubiet. Nitolbu għal ħutna kollha li qed ibatu minħabba l-gwerra; qed niftakar b’mod speċjali fl-Ukrajna fejn bosta nies m’għandhomx enerġija elettrika minħabba l-attakki bla ħniena fuq l-infrastrutturi li, minbarra li jġibu mewt u tbatija, jġorru magħhom ukoll riskju ta’ katastrofi umanitarja ta’ qies bla tarf. Jekk jogħġobkom, ma ninsewx lill-imsejkna Ukrajna mifluġa! U niftakru, f’Gaża, li għaddejja minn tbatija kbira, u f’tant aktar inħawi fejn hemm il-gwerra.
U issa nduru bit-talb lejn il-Verġni Marija: nitgħallmu minnha nkunu qrib Ġesù f’dal-jiem tal-Ġimgħa Mqaddsa, biex naslu għall-hena tal-Qawmien.
Sors: laikos.org