Salm 121

Salm 121

Il-Mulej jgħasses fuqna

1 Għanja tat-Telgħat.
   Nerfa’ għajnejja lejn l-għoljiet;
   mnejn se tiġini l-għajnuna?

2 L-għajnuna tiegħi mingħand il-Mulej,
   li għamel is-sema u l-art.

3 Ma jħalli qatt li riġlek jogħtor;
   ma jongħosx dak li jħarsek.

4 Ara, la jongħos u lanqas jorqod
   dak li jħares lil Iżrael.

5 Il-Mulej hu dak li jħarsek;
   il-Mulej hu d-dell tiegħek fuq lemintek.

6 Ma tolqtokx ix-xemx binhar,
   anqas il-qamar billejl.

7 Iħarsek il-Mulej minn kull deni;
   hu jħarislek ħajtek.

8 Il-Mulej iħarsek fil-ħruġ u d-dħul tiegħek,
   minn issa u għal dejjem.