Fl-okkażjoni tal-Jum Dinji għal Persuni b’Diżabilità, se jkun qed jerġa’ jsir il-Kunċert tal-Forzi Armati ta’ Malta b’risq id-Dar tal-Providenza, wara waqfa ta’ sentejn minħabba l-pandemija COVID-19. Il-kunċert se jsir nhar il-Ġimgħa, 2 ta’ Diċembru 2022, fis-7.30pm. Il-Kunċert vokali u instrumentali se jsir fil-Katidral Metropolitan ta’ San Pawl fl-Imdina u se jkun taħt il-patroċinju distint tal-E.T. Dr George Vella u l-E.T. Mons. Arċisqof Charles J. Scicluna.
Il-Banda tal-Forzi Armati ta’ Malta se tkun taħt it-tmexxija tas-Surmast Kaptan Jonathan Borg.
Matul is-serata se jkunu qed jitħabbar il-Premju Mons Mikiel Azzopardi għal din is-sena. Id-Dar tal-Providenza tagħti dan il-Premju kull sena b’għarfien u apprezzament tax-xogħol volontarju li jsir ma’ persuni b’diżabilità f’Malta u Għawdex.
Id-dħul għall-kunċert huwa b’xejn. Dawk li se jattendu huma ġentilment mitluba li jieħdu posthom sas-7.15pm.