Stqarrijiet għall-Istampa

Inawgurat xogħol ta’ restawr fuq il-Knisja Arċipretali taż-Żurrieq

05/05/2023   Il-Knisja Arċipretali ta' Santa Katerina, iż-Żurrieq

Ġie inawgurat xogħol ta’ restawr fuq il-Knisja Arċipretali taż-Żurrieq – proġett li twettaq b’investiment ta’ €81,000 li minnhom 80% kienu fondi Ewropej u 20% kienu koperti mill-parroċċa. Il-proġett ġie inawgurat mill-Isqof Awżiljarju Joseph Galea Curmi u mis-Segretarju Parlamentari għall-Fondi Ewropej Chris Bonett, fil-preżenza tal-Arċipriet Dun Daniel Cardona u s-Segretarju Amministrattiv tal-Arċidjoċesi Michael Pace Ross.

Il-proġett, li dam madwar għaxar xhur, kien jikkonsisti fir-restawr tal-koppla minn barra, inkluż il-lanterna u l-aperturi tal-injam… Kompli aqra »

19-il entità tal-knisja mill-qasam soċjali tiltaqa’ mal-Arċisqof

03/05/2023

19-il organizzazzjoni fi ħdan il-Knisja f’Malta li joffru s-servizzi tagħhom fil-qasam soċjali ltaqgħu mal-Arċisqof Charles Scicluna nhar l-Erbgħa 26 t’April 2023 fil-Kurja tal-Arċisqof, il-Furjana. L-organizzazzjonijiet, li jagħmlu parti mis-Segretarjat tad-Djakonija, tkellmu dwar il-ħidma tagħhom u r-realtajiet li qegħdin iħabbtu wiċċhom magħhom ta’ kuljum.

Wara li sema’ l-preżentazzjonijiet tagħhom, l-Arċisqof għamel diskors qasir tal-għeluq fejn irringrazzja lil kull organizzazzjoni tal-ħidma importantili qed twettaq fis-soċjetà Maltija… Kompli aqra »

Is-“suċċess” ekonomiku ta’ pajjiżna qatt m’għandu jinkiseb a skapitu tal-ħaddiema

29/04/2023

F’Jum il-Ħaddiem ta’ din is-sena, il-Kummissjoni Ġustizzja u Paċi tixtieq tesprimi t-tħassib tagħha dwar l-inġustizzja mġarrba minn persuni mhux mill-UE li jaħdmu f’Malta, li minkejja li jħallsu l-kontribuzzjonijiet tas-sigurtà soċjali, ma jirċivux  pensjoni. Is-sistema tal-pensjoni tagħna hija msejsa fuq ħaddiema mhux mill-UE li jibqgħu hawn għal ftit snin, iħallsu l-kontribuzzjonijiet tas-sigurtà soċjali u jitilqu qabel ma jirċievu l-pensjoni. Il-Kummissjoni temmen li dan il-mudell ta’ soċjetà huwa soċjalment inġust u moralment inaċċettabbli… Kompli aqra »

Jum il-Karità 2023

28/04/2023

Fil-jiem li ġejjin il‑Knisja f’Malta se tfakkar Jum il‑Karità. L‑għan ta’ dan il‑jum hu li jikber l‑għarfien dwar il‑ħidma li jwettqu fis‑soċjetà l-entitajiet tal‑Knisja mal‑persuni vulnerabbli. Permezz ta’ diversi djar residenzjali u ħidmiet ta’ karità minn professjonisti u voluntiera, il‑Knisja f’Malta tilqa’ u taqdi lil ħutna fil‑bżonn, irrispettivament mir‑razza, kulur tal‑ġilda jew twemmin.

Bħalissa hemm iktar minn 1,600 persuna jgħixu fid‑djar residenzjali tal‑Knisja… Kompli aqra »

L-ordinazzjoni ta’ żewġ djakni ġodda

20/04/2023

L-Arċisqof Charles Jude Scicluna se jordna żewġ djakni ġodda nhar is-Sibt li ġej, 22 ta’ April 2023. Il-quddiesa se ssir fil-Konkatidral ta’ San Ġwann, il-Belt Valletta, fid-9:30am. Iż-żewġ djakni huma s-seminaristi Malcolm John Saliba mill-Parroċċa ta’ Santa Marija Mtellgħa s-Sema, Ħ’Attard, u Karl Andrew Schembri mill-Parroċċa tat-Twelid tal-Verġni Marija, il-Mellieħa.

Din se tixxandar fuq Knisja.mt u Newsbook.com.mt.

Permezz ta’ din l-ordinazzjoni, id-djakni l-ġodda jsiru xebh ma’ Ġesù Kristu li ried ikun ‘djaknu’, jiġifieri qaddej ta’ kulħadd… Kompli aqra »

Il-ktieb għat-tfal ‘Spazju għal Qalbi – Beloved Space’ jinsab għall-bejgħ

18/04/2023

Il‑ktieb għat‑tfal ‘Spazju għal Qalbi – Beloved Space’, maħruġ mit‑taqsima Żvilupp Spiritwali fl‑iskejjel fi ħdan l‑Arċidjoċesi ta’ Malta b’kollaborazzjoni mal‑Aġenzija Nazzjonali tal‑Litteriżmu, issa jinsab għall‑bejgħ. Dan il‑ktieb, li għandu 11‑il storja miktuba minn Silvana Cardona, jikkonsisti fi stejjer qosra ta’ madwar 500 kelma. L‑istejjer huma ambjentati f’Malta u jittrattaw dwar tfal u adulti li jesperjenzaw sitwazzjonijiet differenti f’ħajjithom.

Il‑ktieb hu maħsub għat‑tfal bejn it‑tmien snin u t‑12‑il sena u l‑iskop ewlieni tiegħu hu li qarrejja żgħar fl‑età jkollhom ġabra ta’ stejjer qosra b’temi spiritwali li jistgħu jirrelataw magħhom, u li jħeġġuhom jirriflettu u jitolbu… Kompli aqra »

Il-Knisja tappoġġja bis-sħiħ monument ta’ tifkira

16/04/2023

Fit-2 ta’ Novembru 2019, l-Arċisqof bierek il-qabar ta’ Ġużè Ellul Mercer fil-parti taċ-Ċimiterju tal-Addolorata li fl-imgħoddi ma kinitx imbierka

L-Arċidjoċesi ta’ Malta hi diżappuntata li llum It-Torċa ppubblikat storja fil-faċċata tagħha mimlija ineżattezzi dwar proposta li saret fl-2020 biex isir monument li jonora lil dawk affettwati mill-interdett maħruġ mill-Knisja fis-sittinijiet.

Il-gazzetta – li qagħdet biss fuq it-tagħrif ipprovdut miċ-Chairman tal-Aġenzija Kulturali għall-Belt Valletta, Jason Micallef – qalet li l-Knisja ma weġbitx għat-talba li għamel l-eks Ministru José Herrera biex jitpoġġa monument fil-ġnien tal-Palazz tal-Arċisqof fil-Belt Valletta, li mbagħad jinfetaħ għall-pubbliku… Kompli aqra »

L-Arċisqof jgħammed tnax-il adult minn tmien pajjiżi differenti

08/04/2023

Illejla, waqt il-Vġili Solenni tal-Qawmien tal-Mulej mill-Imwiet fil-Konkatidral ta’ San Ġwann, l-Arċisqof Charles Jude Scicluna ser jiċċelebra s-Sagramenti tad-Dħul fil-Ħajja Nisranija (magħmudija, griżma u tqarbin) lil 12-il katekumenu, jiġifieri persuni li f’età adulta jagħżlu l-ħajja Nisranija. 

It-12-il adult, li llejla b’dawn is-sagramenti se jsiru membri ġodda tal-Knisja Kattolika, huma minn Malta, iċ-Ċina, it-Turkija, il-Latvija, l-Ingilterra, Franza, in-Nepal u l-Albanija.

Matul ir-Randan, dawn il-persuni ltaqgħu mal-Arċisqof Scicluna bi tħejjija għal dan il-mument importanti f’ħajjithom… Kompli aqra »

Ċelebrazzjonijiet liturġiċi mmexija mill-Arċisqof fil-Ġimgħa Mqaddsa

01/04/2023

L‑Arċisqof Charles Jude Scicluna jistieden lill‑Insara biex jieħdu sehem fiċ‑ċelebrazzjonijiet tal‑Ġimgħa Mqaddsa li matulhom l‑Knisja Kattolika tfakkar il‑passjoni, il‑mewt u l‑qawmien ta’ Sidna Ġesù Kristu. Kulħadd mistieden jattendi għaċ‑ċelebrazzjonijiet li ser jippresiedi fil‑Konkatidral ta’ San Ġwann, il‑Belt Valletta. Dawn se jixxandru b’mod dirett fuq TVM, TVMNews+, Radju 103 u online fuq Knisja.mt u Newsbook.com.mt.

Nhar il‑Ħadd li ġej, 2 ta’ April, fis‑9:30 a.m., Monsinjur Arċisqof imexxi ċ‑ċelebrazzjoni ta’ Ħadd il‑Palm, bit‑tberik tal‑friegħi taż‑żebbuġ u l‑palm, u wara jkompli bil‑Passjoni tal‑Mulej fejn jinqara r‑rakkont tal‑passjoni mill‑Evanġelju skont San Mattew… Kompli aqra »

Direttur ġdid għal Missio Malta

30/03/2023

Il‑Kongregazzjoni għall‑Evanġelizzazzjoni tal‑Popli tas‑Santa Sede ħatret lil Dun Victor Agius bħala direttur ġdid ta’ MISSIO Malta għall‑ħames snin li ġejjin (2023‑2028).

Il‑MISSIO għandu l‑għan li jgħin lill‑Papa fit‑tixrid tal‑ispirtu missjunarju fost il‑qassisin, reliġjużi, adulti u tfal u jinkoraġġixxi l‑għajnuna lill‑foqra permezz ta’ għajnuna finanzjarja għal proġetti f’pajjiżi tat‑Tielet Dinja. Il‑MISSIO jieħu ħsieb ukoll ix‑xandir tal‑Kelma ta’ Alla f’dawk il‑pajjiżi li qatt ma ġew evanġelizzati… Kompli aqra »