Għada l‑Ħadd, 18 ta’ April 2021, il‑Knisja f’Malta se tfakkar Jum il‑Karità. L‑għan ta’ dan il‑jum hu li jikber l‑għarfien dwar il‑ħidma li jwettqu fis‑soċjetà l-entitajiet tal‑Knisja mal‑persuni vulnerabbli. Permezz ta’ diversi djar residenzjali u ħidmiet ta’ karità minn professjonisti u voluntiera, il‑Knisja f’Malta tilqa’ u taqdi lil ħutna fil‑bżonn, irrispettivament mir‑razza, kulur tal‑ġilda jew twemmin. Fuq xewqa tal-Arċisqof Charles Scicluna, għada fid-9:30am, il-Quddiesa tal-Ħadd ser tixxandar mill-kappella tas-Sorijiet Missjunarji tal-Karità (magħrufa bħala s-Sorijiet ta’ Madre Tereża) f’Bormla… Kompli aqra »

Minn nhar il‑Ħadd li ġej, 18 ta’ April 2021, l‑Insara ser ikunu jistgħu jerġgħu jipparteċipaw fil‑quddies fil‑knejjes f’Malta u Għawdex. Dan wara r‑reviżjoni tal‑miżuri li tħabbru mill‑Awtoritajiet tas‑Saħħa l‑ġimgħa li għaddiet.

F’messaġġ fuq il‑media soċjali, l‑Arċisqof Charles Jude Scicluna stieden lil kull min jista’, sabiex il‑Ħadd li ġej jinġabar fil‑knejjes biex jisma’ l‑Kelma ta’ Alla u jirċievi l‑Ewkaristija.

L‑Insara huma mħeġġa jattendu għall‑quddies mal‑komunità filwaqt li jkomplu jħarsu l‑miżuri għall-ħarsien tas-saħħa kif sar qabel… Kompli aqra »

L‑Arċidjoċesi ta’ Malta tinnota b’dispjaċir l‑istqarrija tal‑kumpanija GO iktar kmieni llum, fejn intqal li l‑ammont ta’ donazzjonijiet irrappurtati miġbura permezz ta’ maratoni televiżivi ġie rivedut ’l isfel b’€1.4 miljun. Is‑Segretarju Amministrattiv tal‑Arċidjoċesi, Michael Pace Ross, qal li kważi nofs dan it‑tnaqqis, ekwivalenti għal €654,000, se jaffettwa l‑pjanijiet tad‑Dar tal‑Providenza u l‑Caritas, b’impatt dirett fuq il‑ħidma matul din is‑sena ta’ dawn iż‑żewġ istituzzjonijiet ta’ karità tal‑Knisja.

F’laqgħa mal‑Kap Eżekuttiv tal‑GO s‑Sur Nikhil Patil, is‑Sur Pace Ross esprima d‑diżappunt tal‑Arċidjoċesi u qal li dan ma kienx il‑livell ta’ servizz li l‑Arċidjoċesi tistenna mill‑kumpanija GO… Kompli aqra »

L-Arċisqof Emeritu Mons. Pawlu Cremona O.P. jinsab rikoverat l-Isptar Mater Dei f’kundizzjoni medika tajba wara li lbierah filgħaxija sarlu intervent minuri f’qalbu.

Waqt il-Quddiesa tal-Ħadd li xxandret dalgħodu, Mons. Arċisqof Charles Scicluna ħeġġeġ lill-Insara biex jitolbu għalih. Kompli aqra »

…

Il-mużajk ta’ Marija mtellgħa s-sema li jisab mal-frontispizju tal-knisja parrokkjali tal-Imġarr

Dalgħodu ġew inawgurati diversi proġetti ta’ konservazzjoni u restawr fil‑parroċċi ta’ Ħad‑Dingli u l‑Imġarr, permezz tal‑ħidma li saret mill‑Fondazzjoni għall‑Patrimonju Kulturali tal‑Arċidjoċesi ta’ Malta. Il‑proġetti saru b’kofinanzjament ta’ 80% minn fondi tal‑Unjoni Ewropea, b’investiment totali ta’ €217,000. Il‑proġetti ġew inawgurati mill‑Isqof Awżiljarju Joseph Galea‑Curmi u mis‑Segretarju Parlamentari għall‑Fondi Ewropej Stefan Zrinzo Azzopardi.

F’Ħad‑Dingli ġew irrestawrati diversi opri tal‑arti: l‑14‑il pittura tal‑Via Sagra, il‑pedestall u n‑niċċa tal‑Madonna tar‑Rużarju, il‑pittura tal‑Adorazzjoni tas‑Slaten Maġi, il‑pittura tal‑Madonna tar‑Rużarju, il‑pittura tal‑artist Portugiż Manuel Pereira li turi t‑tieġ bejn San Ġużepp u l‑Madonna, u l-istatwa tas-seklu sittax ta’ San Ġwann Battista, li hi maħsuba li nġiebet Malta mill-Ordni tal-Kavallieri ta’ San Ġwann… Kompli aqra »

Is-Segretarjat għall-Edukazzjoni Nisranija, b’konsultazzjoni mal-iskejjel tal-Knisja, jinforma li: 

L-Iskejjel tal-Knisja fil-livell kindergarten u primarju se jiftħu fiżikament nhar it-Tnejn, 12 ta’ April, b’osservanza tal-protokolli tas-saħħa. L-iskejjel li kellhom sistema ta’ attendenza alternata minħabba l-ispazji li huma għandhom se jkomplu b’dik is-sistema. 

L-iskejjel sekondarji se jibdew lezzjonijiet online nhar it-Tnejn, 12 ta’ April, u se jiftħu fiżikament nhar l-Erbgħa, 14 ta’ April… Kompli aqra »

Is‑Segretarjat għall‑Edukazzjoni Nisranija u l‑Assoċjazzjoni tal‑Iskejjel tal‑Knisja (CSA) huma serjament imħassba dwar diversi punti proposti fil‑white paper dwar “l‑użu responsabbli tal‑kannabis”.

Fid‑dawl tal‑proposti mressqa, is‑Segretarjat u s‑CSA jisħqu li għandha tingħata prijorità għall‑konsegwenzi marbuta mas‑saħħa mentali taż‑żgħażagħ kif ukoll dwar tisħiħ ta’ kultura ta’ konsum ta’ droga fost il‑ġenerazzjonijet żagħżugħa ta’ issa u tal‑futur. Għalhekk, qed jappellaw lill‑membri parlamentari sabiex iżommu dejjem l‑ewwel u qabel kollox is‑saħħa mentali taż‑żgħażagħ u mhux l‑interessi tal‑ftit li ser jistgħanew minn fuq dan in‑negozju… Kompli aqra »

Din is‑sena wkoll, minħabba l‑pandemija tal‑COVID‑19, l‑Insara qed jiġu mistiedna jipparteċipaw fiċ‑ċelebrazzjonijiet tal-Ġimgħa Mqaddsa permezz tal‑mezzi ta’ komunikazzjoni soċjali. L‑Arċisqof Charles Scicluna ser imexxi dawn iċ‑ċelebrazzjonijiet li ser jixxandru b’mod dirett fuq TVM2, u online fuq Knisja.mt u Newsbook.com.mt.

Il‑Ħadd 28 ta’ Marzu, fid‑9:30 a.m., Mons. Arċisqof imexxi ċ‑ċelebrazzjoni ta’ Ħadd il‑Palm, bit‑tberik tal‑friegħi taż‑żebbuġ u l‑palm, u wara jkompli bil‑Passjoni tal‑Mulej fil‑Katidral ta’ San Pawl, l‑Imdina… Kompli aqra »